नेपालको नयाँ देउसी भैलो गित.....

भन भन भाई हो :- नौ महिना
गन गन बैनी हो :- नौ महिना
गर्भमा मान्छे  :- नौ महिना
सरकारका भान्छे :- नौ महिना
मनमोहन सरकार  :- नौ महिना
ओली सरकार  :- नौ महिना
प्रचण्ड सरकार :- नौ महिना
पख पख देउवा  :- नौ महिना

हामी त्यसै आएनौँ अदालतले खटायो !
लोकमानजीको घरमा नोटिस टाँस्न पठायो !!
नोटिस टाँस्न जाँदा घरमा ज्वाइँ राजाले खेदेका !
हाम्रा तामिलदारले बाउको बिहे देखेका !!
अदालतको छातीमा यमराजको पैतालो !
नामै सुन्दा संसदमा जान्थ्यो हेर भुईचालो !!

सबै पार्टी मिलेर पहिले त्रिशुल डामेको !
साँढे हान्न आउँदा अहिले धनु कामेको !!
एउटा ठेगान लाग्दैछ हजार लोकमान जागा छन !
कसले तह लगाउँने तिनलाई हान्ने राँगा झन !!

भिर उक्लेका  :- लोकमान सिंह
सिङ फुक्लेका :- लोकमान सिंह
पिराए सारा :- लोकमान सिंह
अस्ताए तारा :-  लोकमान सिंह

सिस्नुपानी नेपालका हामी कवि कलाकार नि लै लै !
प्रज्ञाको दैलो खेल्दै देउसी भैलो नाच्दै आयौँ छमछम !!
काठमाण्डौको खाल्टो सडक के सकिन्थ्यो हिंडेर नि लै लै !
मेट्रो पनि चलेन फास्ट ट्रयाक पनि खुलेन हिँड्दै आयौँ ठमठम !!
जेठो पार्टी काँग्रेस नै दह्रो खुट्टा टेक्दैन !
छिमेकीले ढुंगा हान्दा किन छेक्दैन !!
पहिलो पार्टी काँग्रेसको बिदेश नीति खुट्याई देउ !
भाले हो कि पोथी हो लिङ्ग पनि छुट्याई देऊ !!

शेर बहादुरले प्रचण्डलाई प्रधानमन्त्री दिएर !
नौ महिनालाई सुते स्लिपिङ ट्याब्लेट खाएर !!
सपना देखे देउवाले प्रधानमन्त्री भएको !
कालो बोको तान्दै बालुवाटार तिर गएको !!
झस्के सपना देखेर पुच्छ्रे तारा खसेको !
ब्युँझदा त कुर्सीमा अर्कै बोको बसेको !!
आए केपी गए केपी ख्वाए खरो सुरती !
भुल्नै गाह्रो लाउरे माया चाउरे पिरती !!

ख्याट्ट पारे डिजिटल चुलो बाले भरर !
चुच्चे रेलमा लुम्बिनी लगी हाले सरर !!
उपर खुट्टी लगाएर रोबटलाई खेत जोताए !
रोबटनीलाई चुला चौका आँगन पनि पोताए !!
हावाबाट बिजुली पाईपबाट ग्याँस पाईयो !
भाईबरबाट दाल भात खाईयो झ्याप्प निदाईयो !!
सपना नै सही रेल पानी जहाज चल्दथ्यो !
केपी जति भए नेता काम धेरै चल्दथ्यो !!

संसदमा माधव नेपाल डाँको छोडी रोएछन !
किन रोए भनी बुझ्दा बूढो पो भएछन !!
गुट बनाउँने फुट गनाउँने एमालेको चरित्र !
बाहिर नजाउ शत्रु खोज्न खोज त्यहीँ भित्र !!
प्रधानमन्त्री प्रचण्डका केटा केटी पिए छन !
खेल्दा खेल्दै फेसबुक पनि प्वाल पारी दिएछन !!
आफूलाई बचाउँदै हल्ली खल्ली मच्चाउँदै !
जाने भयो नौ महिना त्रुटीहरु सच्याउँदै !!

मोदीसँग केमेस्ट्री मिल्छ भन्दै मस्किन्छन !
खुस्काउँने हो कुन दिन भित्र भित्रै झस्किन्छन !!
माओवादी केन्द्रले गिनिजमा नाम लेखायो !
पार्टी मेम्बर सबलाई सिएम बनाई देखायो !!
धामी झाँक्री पुरेत पण्डित पार्टी प्रवेश गराए !
टुप्पी जनै काट्ने क्रान्ति कता हराए !!

लोकमानको फाईल :- हरायो
अदालतको डायल :- हरायो
म्याद टाँस्ने भित्तो :- हरायो
सेनाको पासपोर्ट :- हरायो
देउवाको बाटो  :- हरायो
बिसाखा पटनम :- हरायो
फास्ट ट्रयाकको कुरो :- हरायो
चाइनिज तेल पुरै :- हरायो ।
टिकापुर काण्ड :- हरायो
दोषीलाई दण्ड :- हरायो
नेपाली जनता :- डरायो
नहराओस देश भन्दै :- करायो

हाम्रा जनप्रतिनिधि संसदबाट भागेर नि लै लै !
एनजिओमा जान्छन मासु भात खान्छन !!
खाम थाप्छन खुरु खुरु !
देशमा जब संकट आउँछ सलबलाउँछन !!
जोगी बाबा नि लै लै !
हाम्रा नेता बफादार परि रहन्छन लम्पसार !!
खल्बलाउँछन शान्त नेपाल !!!

यता लोकमान कराए उता पिएम डराए !
हिसाब किताब मिलाउँदा फाईल पनि हराए !!
बोली बोली ओलीले प्रचण्डलाई पिराए !
केही नबोली प्रचण्डले ओली सरकार गिराए !!
एउटा यता पिराउँने अर्को उता गिराउँने !
यही मौकामा लैनचौरले औँलो पनि छिराउँने !!
कस्तो सरकार छिमेकीका राजदुतले नै चलाउँने
हाम्रा नेता लन्ठ्याङ लन्ठ्याङ पुच्छर मात्र हल्लाउँने !!

एउटा सरकार बन्दा दिल्ली दिपावली मनाउँछ !
अर्को बन्दा त्यहि दिल्लीलाई किन गनाउँछ !!
तिमी आफैं सुधार तिम्रो युपि बिहार !
हाम्रो देश हाम्रै जिम्मा दागा नधर !!
नेत्र बिक्रम चन्द हुन कि नेत्र बिक्रम चन्दा हुन !
कार्यकर्ता भन्दा बढी पैसा धेरै गन्दा हुन !!
अर्को मुक्ति युद्ध भन्दै बन्दुक बोक भन्दा हुन !
बुझ युवा यी फन्दा सबै बेकारका धन्दा हुन !!

एकातिर करिश्मा अर्कातिर हिसिला !
नयाँ शक्ति पार्टीका मुहार कति हँसिला !!
झुण्ड्याएर रातो कोट मैलो कालो भित्तामा !
बाबुरामको नयाँ शक्ति अलमल कित्तामा !!
टालाटुली बटुली पार्टी बन्यो झुम्राले !
बाबुरामलाई किन छाडे लिखा र जुम्राले !!
एनसेलमा गराए अरबौँको घोटाला !
घोटालाले बिदेशमा दरबार पोताला !!

चोर्ने लुट्ने मार्ने काट्ने सबलाई तक्मा लगाई देउ !
पुलिस मुद्दा हाल्दै जान्छ सरकार फिर्ता ल्याउ !!
तरकारीको उपचार इन्जेक्शनले गरिन्छ !
नखाउँ भोकै बसिन्छ खाँदा खेरी मरिन्छ !!
बजार कब्जा गरेर खडा गर्छन सिण्डिकेट !
ट्याक्सी मिटर चुँडाएर तोक्छन आफ्नै रेट !!
यातायातको डनले सरकार सुस्त पार्दिन्छ !
जनतालाई बसमा कोची भिरमा झार्दिन्छ !!

बाबु प्रश्न बनाउँने छोरालाई उत्तर लेखाउँने !
अख्तियारले तिनलाई हरियो बत्ती देखाउँने !!
किन पढ्छौ ए छोरा सर्टिफिकेट किनौंला !
क्लिनिक खोली बिरामीका किड्नी छिनाउँला !!

भन भन भाई हो :- नक्कली
गन गन बैनी हो :- नक्कली
पाईलट डाक्टर :- नक्कली
विद्यार्थीे मास्टर :- नक्कली
जहाजका पाङ्ग्रा :- नक्कली
टियूका थेसिस :- नक्कली
तरकारी हरिया :- नक्कली
सांसदका भरिया :- नक्कली

केपी सुत्छन सरकार उठ्छ केपी उठ्छ्न !
सरकार सुत्छ नि लै लै !!
अनशन हो भन्छन दशैं छुट्टि लिन्छन !
डाक्टर सरकार उस्तै उस्तै छन !!
हाम्रो देशका प्लेनमा स्याल पनि भिलेन नि लै लै !
कहिले पुच्छर अड्किन्छ कहिले रुखमा लड्किन्छ !!
बिहान बेलुका पाङ्ग्रा पड्किन्छ !!!

सफाई भयो बागमतीमा पानी बग्छ अहिले !
यस्तो सफाई राजनीतिमा फेरी होला कहिले !!
देशको माटो जोगाउँने तिलाठेली जिन्दाबाद !
मर्ने तर नझुक्ने नेपाली जनता जिन्दाबाद !!

आफ्नो ज्यान गुमाएर यात्रुलाई बचाउँने !
पिडितका आवास बनाई तिनलाई हँसाउँने !!
हृदय खोली कर्म गर्ने देश प्रेमी जिन्दाबाद !
कृतज्ञता ज्ञापन गरौँ या भनौँ धन्यबाद  !!

सुन्तली धुर्मुस :-  धन्यबाद
सुशीला कार्की :- धन्यबाद
सन्दुक रुईत :-  धन्यबाद
महावीर पुन :-  धन्यबाद
लीलामणि पौडेल :- धन्यबाद
ओम प्रकाश अर्याल :- धन्यबाद
महेन्द्र शाही :- धन्यबाद
राधेश्याम अधिकारी :- धन्यबाद
सर्वेन्द्र खनाल :- धन्यबाद
सन्तोष राना :- धन्यबाद
दिनेश न्यौपाने :- धन्यबाद
देव नारायण यादब :- धन्यबाद

हाम्रो देश नेपालमा कानूनको शासन भन्छन नि लै लै !
सरकारका मतियार बोकी हिड्छन हतियार !!
के को कानून डनकै शासन !!!
चोरका घरमा गास बास तिनै सँग साँठ गाँठ नि लै लै !
भ्रष्ट होस कि हत्यारा तस्कर होस कि लुटेरा !!
मुद्दा फिर्ता लिन्छ सरकार !!!
न्यायधिशले आफ्नै जन्म मिति पनि बिर्सेछन !
झुक्किएर त्यसमा ब्लेड लगाई खुर्केछन !!

अन्त न्याय नपाएमा अदालत जाने हो !
अदालत नै भ्वाङ परे अब कता जाने हो !!
आशा गर्ने ठाउँ नयाँ एउटा बाँकी देखियो !
सर्वोच्चमा सुशीलाको नाउँ पनि लेखियो !!
महानगर भन्छ घरको फोहोर बाहिर नफालौं !
प्रकृति नै रुने गरी प्लास्टिकहरु नबालौं !!
फोहोर फाली कर छली एक छिनलाई त रमाउँला !
महानगर आएर फेरि च्याप्पै समाउँला !!

अँध्यारोमा खाडल छल्दै सडकमा झरेको !
गौँडा ढुक्ने ट्राफिकका फेला पनि परेको !!
च्याप्प समाई चिट काट्यो अंग्रेजीमा हप्कायो !
चालक रैछ साईकलको पुलिस चित खायो !!
लडाईँ किन गर्ने हो ह्रश्व दीर्घ उकारमा !
हिन्दी चलाउँ नदुखाउँ टाउको बेकारमा !!
हिन्दीमा नै लेखाउँछौँ हिन्दीमा नै पढाउँछौँ !
हिन्दीमा नै हाम्रो देउसी अघि बढाउँछौँ !!

बोलो बोलो भाईयों :-  बोलते हैँ
मन खोलो बहनों :- खोलते हैँ
जो–जसका माया :- पाते है
उसीके आँगनमे :- आते है
सबके साथ घुसघुस :- करते हैँ
कानमे कुछ कुछ :- भरते हैँ
नेताओँकोे पाठ  :- पढाते हैँ
एक आपसमे :- लडाते हैँ
भाषामे गडबड :- करते हैँ
आ–आफ्नै चौरमे :- चरते हैँ
मैथिलीको थप्पड :- मारते हैँ
भोजपुरीको धरापमे :- पारते हैँ
थारुको मिट्टीमा :- गाड्ते हैँ
राई–लिम्बू–नेवार  :- भाँड्ते हैं
झगडको झाडु :- मारते हैँ
नयाँ–नयाँ भाषा :- सिख्ते हैं
हिन्दीमे बात :- करते हैँ
पकेटमा गाँठी :- भरते हैँ

सरकारी मास्टर साहेब स्कूलबाट सधैँ गायब नि लै लै !
छड्के झोला भिरेर पार्टी भित्र छिरेर !!
नेताजीको लुतो कनाउँछन !!!
नेपालका कर्मचारी युनियनका अधिकारी नि लै लै !
आँखामा धुलो छर्दिन्छन कानमा के के भर्दिन्छन !!
मन्त्रीलाई नै सरुवा गर्दिन्छन !!!

आशिष
सरकारलाई वायु :- नचलोस
नौ महिना नपुगी :- नढलोस
छिमेकीको छिर्के :- रोकियोस
राजदूतकोे सीमा :- तोकियोस
अख्तियारले एम्बुस :- नथापोस
संसद र सरकार :- नकाँपोस
महाअभियोग :- फेल नहोस
लोकतन्त्र मास्ने :- खेल नहोस
भूतपूर्व राजा :- भूतै हुन
चम्चा र काँटा :- उतै हुन
भिरमा गाडी :- नझरोस
टाईफसले निम्तो :- नगरोस
तिब्बतको बाटो :- रेल आओस
रेलमा चढी :- तेल आओस
माफियाले सेटिङ्ग :- नगरोस
अनसन बस्नु :- नपरोस
सांसदले मान्छे :- नबेचुन

फौजदारी मुद्धा :- नखेपुन
नजाओस् व्यापार :- घाटामा
नपरोस मापसे :- बाटोमा
बन्दुक छुँदा :- फुल होस
तुईन छुँदा :- पुल होस
बराबर बाँड्ने :- भान्छे होस
नेतालाई छुँदा :- मान्छे होस
म्याद टाँस्ने भित्तो :- भेटियोस
अराजक तन्त्र :- मेटियोस
रेमिट्यान्सको रेट :- बढ्दो होस
हुण्डीको रजाईँ :- घट्दो होस
ट्वीटरमा लोग्ने :- नउनोस
फेसबुकमा स्वास्नी :- नझुण्डियोस
छानोमा छुँदा :- सोलार होस
रुपियाँ छुँदा :- डलर होस
नेपाली जनताको :- जय होस

अर्को साल आउँला देउसी गाउँला सारङ्गी नै रेटौँला !
संबिधान लागु भए फेरि नेपालमा भेटौँला !!
सयौँ थुङगा फूलका हामी एउटै माला नेपाली !
माला चुँडाउनेका गाला चड्काउँ हामी नेपाली !!
             keshav Raj Adhikari

स्वर्ग कहाँ छ..........

      छुरिले रेटेपनि काटिदैनन मेरा यी दुखहरु,थैलो भरिको पैसाले साटेपनी साटिदैनन मेरा पीडाहरु। अचानोमा राखिएको लास जस्तो,घाटमा राखिएको मुर्दा जस्तो
अबिछिन्न जिन्दगीको यो सुरु कतै यी मन किन रुवाएर जान्छन आफन्तहरु। किन सताएर जान्छन मनका ढुकढुकिमा बस्नेहरु,आज जिन्दगीको अनगिन्ती पिडाहरुबाट उठेर एउटा प्रश्न गर्न मन लागेको छ। मानिसको जिन्दगीमा जब मानिसले चाहेको कुराहरू गर्न सक्दैन। उसको लागी यही जिन्दगी नर्क जस्तै हो। तर त्यही मानिस जो आफू खुशीले जिन्दगी बाँची रहेको हुन्छ। अाँटेको कुरा पुग्छ,उसको लागि स्वर्ग यही हो।

     धेरै मानिसहरू भन्छन मरि सके पछिको स्वर्ग अर्कै आनन्द छ। तर मलाई लाग्छ यो संसारमा स्वर्ग कतै छैन,छ भने स्वर्ग यही छ र नर्क पनि यही छ। कहिले काही आफ्नो जिन्दगीलाई दाँजेर हेर्छु म,स्वर्ग यही छ जस्तो लाग्छ। कहिले काही आफ्नो जिन्दगीलाई नापेर हेर्छु म,नर्क पनि यही छ जस्तो लाग्छ। स्वर्ग र नर्कको दोसाँधमा बाँची रहें। जिबनको अमुर्त तर जसले जे भने पनि राम्रो काम गर्दै मानिसका पिडाहरुमा मल्हम लगाउँन सकेमा स्वर्ग यही छ। जहाँ आनन्द हुन्छ त्यहाँ स्वर्ग हुन्छ। जिन्दगीका रहरहरु खुसीहरु पुरा भएमा स्वर्ग जस्तो लाग्छ। जिन्दगीका ईच्छाहरु रहरहरु पुरा नभएमा नर्क जस्तो लाग्छ।

     उडेर गएनन मेरा दुखहरु तुफानमा धुलो झै हिडेर गएनन मेरा पिडाहरु। झुपडीमा चुलो झैं मेरा गन्तव्यका यी जिन्दगीका यात्राहरु,मेरा गन्तव्य बिहिन यी जिन्दगीका सम्झनाहरु। मेरा गन्तव्य बिहिन यी जिन्दगीका यादहरु आज पोल्टा भरि राखेर हिडेको छु म। पुगिदैन नजानु पर्ने ठाउँ कहाँ हो मलाई थाहा थिएन। पुग्ने र जानु पर्ने ठाउँहरु कहाँ हो मलाई थाहा थिएन। म मात्र परिकल्पनामा याद र गहिराई भित्र डुबुल्की मार्दै सायद त्यसैले होला लुक्न सक्दैन यी मनका भावनाहरु। अँध्यरोमा छाया झैँ निरन्तर लडी रहने मन भित्रका तृष्णाका लाशहरु बोकेर निरन्तर हिडि रहे जिन्दगीको बाटोमा,तर पनि न बाटो थाहा छ।

     न त गोरेटो थाहा छ,न त जिन्दगीका चौतारीहरु थाहा छ,न त जिन्दगीका बिसौनीहरु ति सब काट्दै बिसौनीमा हराउँदै जिबनका अनगिन्ती दुखहरुलाई साटेर म जिन्दगीको गोरेटोमा एक्लै हिडि रहें हिडि रहें। रहरले वा करले बिदेशीएँ,स्वर्ग त अझ यहाँ पो रहेछ। तर सबै कुरा मात्र पनि स्वर्ग हैन रहेछ। आफु जन्मेको ठाँउ साथी भाई ईष्टमित्र परिवारको खुसी नै स्वर्ग रहेछ। उनीहरुको खुसी मेरो स्वर्ग र मेरो खुसी उनीहरुको स्वर्ग रहेछ। मेरा जिबनका यी पिडाहरुलाई मन भित्र कुवाएर राखुँ। त्यसैले नाङलो भरी फिजाएर पारिलो घाममा सुकाउँन चाहन्छु र अझै यी हावाहरुले उडाउँदै लग्ने मेरा चाहनाहरु पूरा गर्न चाहन्छु,स्वर्ग र नर्क यही छ भन्न चाहन्छु।
                       Keshav Raj Adhikari

गीत

पाउँने भए बजारमा यो मुटु साट्ने थिएँ !
दुखि रहने तिम्रो याद सबै सबै मेट्ने थिएँ !!
त्यति सस्तो छैन रैछ बजारमा मुटु किन्न !
भएको एउटा मुटु पनि पारिदियौ छिन्न भिन्न !!

बल्झी दिन्छौ यादमा अनि आँसु झर्छ !
टुक्रा टुक्रा मुटुले पनि तिम्रै बारे प्रश्न गर्छ !!
के भनेर रोकु म यो परेलिको आँशुलाई !
के भनेर सम्झाउ म यो दुख्ने मुटुलाई !!

जो आफ्नो हुन्न तर उहि किन यति प्यारो !
जसले भुल्छ उसलाई भुल्न किन हुन्छ गाह्रो !!
हाँस्दा तिम्रै याद आउछ रुँदा तिम्रै याद !
हँसाई आखिर रुवाई जाने रैछ तिम्रो साथ !!
           Keshav Raj Adhikari

भुल्दिन तिमीलाई सयौ चोटि मरेपनि !
संगै जिउँने बाचा गरी अन्तै बसाई सरेपनि !!
तिमीले नै भन्ने गर्थ्यौ तिमी बिना बाँच्दिन म !
यो जुनीमा तिमी बाहेक अन्त नाता गाँस्दिन म !!

मलाई दुख्दा रुने मान्छे अाज मलाई रुने पार्यौ !
दुख पर्दा साथ दिने पुर्णिामाको जुन झार्यौ !!
पराई हुनु थियो भने किन बचन दियौ मलाई !
तिमी छँदा यो जिबनमा बाँच्ने अाधार थियो मलाई !!

संगै जिउँने बाचा थियो संगै मर्ने कसम थियो !
जिन्दगीको गन्तब्यमा नपुग्दैमा निभ्यो दियो !!
भुल्दिन तिमीलाई सयौ चोटि मरे पनि !
चोखो माया गर्छु भनी बिश्वाश घात गरे पनि !!
              Keshav Raj Adhikari

तिज आयो भन्छन सबै माईत जान्छन !
म भने बिदेशमा कसका माईत जाउँ !!
दुई बर्षमा एक पटक छुट्टि जान पाईन्छ !
त्यसमा पनि परिवारलाई के के चाहिन्छ !!

मरुभुमीको गर्मीमा घामले पोल्यो सिर मेरो !
को छ र अामा बुझि दिने साँच्चै पिर मेरो !!
खाडि देशमा बसेर परिवारको पेट पाल्नलाई !
रुँदै रुँदै दिन काटेका छौ सबै नेपाली दाजुभाई !!

दिदि लिन जानु थियो छुट्टी पाईन मैले त !
अर्को सालमा आउँला दिदी आईन अहिले त !!
बहिनी पनि रुँदै होलिन दाजु आएनन भनेर !
दुई साल अझै पर्ख बहिनी बाटो हेरेर !!

म बिदेशी भए पछि दिदी बहिनी नभेट्दा !
तिम्रो मन त रुन्छ होला हामीलाई नदेख्दा !!
टाढा बरु मै छु दिदी आउँनु घरमा भेटन !
बाँचे अर्को सालमा आउँला तिमीलाइ देख्न !!
              keshav Raj Adhikari

रेखा थापासंग बिछोड भएपछि बिरक्तिनु भएका प्रचण्ड ज्युले एक्कासी जोडी भेट्टाउँनु भएछ। सुष्मा स्वराज संगको भेट।

हे दाजु नसमाउ नारीमा !
जान्न म त डिजेलको गाडीमा !!
हिलो लाग्ला नाईलनको साडीमा !!!

यो बोलको नृत्यले सबैलाई मनोरन्जन प्रदान गरोस। रिसानी माफ होस है पूर्व प्रधानमन्त्री ज्यु.....!!!
           Keshav Raj Adhikari

कस्तो हुन्छ चोखो माया गर्नेलाई नै थाहा हुन्छ !
कति दुख्छन चोटहरू पर्नेलाई नै थाहा हुन्छ !!

बाध्यता र बिबसताका कथा व्यथा जति सबै !
अभाबमा सधैँ आँशु झर्नेलाई नै थाहा हुन्छ !!

सतहलाई नियालेर देखिंदैनन भित्री कुरा !
जङ्घारको गहिराई तर्नेलाई नै थाहा हुन्छ !!

गाह्रो छ कि सजिलो छ बिछोडमा जिउँनु पर्दा !
प्रत्येक पल तड्पिएर मर्नेलाई नै थाहा हुन्छ !!

कसले लुट्यो सुख शान्ति रमाईलो र हाँसो अनि !
जिन्दगीका सारा खुसी हर्नेलाई नै थाहा हुन्छ !!
             keshav Raj Adhikari